شاه داغيم، چال پاپاغيم،ائل داياغيم، شانلي سهنديم

باشي توفانلي سهنديم

باشدا حئيدر بابا تك قارلا قيروولا قاريشيبسان

سون ايپك تئللي بولودلارلا اوفوقده ساريشيبسان

ساواشاركن باريشيبسان

گؤيده ن ايلهام آلالي سيرري سماواتا دييه رسن

هله آغ كوركو بورون، يازدا ياشيل دوندا گييه رسن

قورادان حالوا يييه رسن

دؤشلرينده سونالار تك شوخ ممه لرده

نه سرين چيشمه لرين وار

او ياشيل تئللري، يئل هؤرمه ده آينالي سحرده

ايشوه لي ايشمه لرين وار

قوي ياغيش ياغسادا ياغسين

سئل اولوب آخسادا آخسين

يانلاريندا دره لر وار

قوي قلم قاشلارين اوچسون فره لرله، هامي باخسين

باشلاريندا هره لر وار

سيلديريملار، سره لر وار

او اتك لرده نه قيزلار ياناغي لاله لرين وار

قوزولار اوتلاياراق نئيده نه خوش ناله لرين وار

آي كيمي هله لرين وار

گول- چيچكدن بزه ننده، نه گلينلر كيمي نازين

يئل اسنده او سولاردا نه درين رازونيازين

اوينايار گوللو قوتازين

تيتره يير ساز تئلي تك شاخه لرين چايدا چمنده
ئل او تئللرده گزه نده، نه كوراوغلو چالي سازين

اؤرده يين خلوت ائديب گؤلده پري لرله چيمنده

قول-قاناددان اونا آغ هووله آچار قمزلي قازين

قيش گئده ر قوي گله يازين

هله نووروز گولو وار، قار چيچه يين وار، گله جكلر

اوزلرين تئز سيله جكلر

قيشده كهليك هوه سيله چؤله قاچديقدا جاوانلار

قاردا قاققيلداياراق نازلي قلمقاشلارين اولسون

ياز، او دؤشلرده ناهار منده سين آچديقدا چوبانلار

بوللو سودلو سورولر، دادلي قاوويتماشلارين اولسون

آد آلير سنده ن او شاعير كي سن اوندان آد آلارسان

اونا هر داد وئره سن، يوز او موقابيل داد آلارسان

تاريدان هر زاد آلارسان

آداق اولدوقدا، سن اونلا داها آرتيق اوجالارسان

باش اوجالديقدا دماوند داغيندا باج آلارسان

شئر الينده ن تاج آلارسان

او دا شعرين، ادبين شاه داغيدير، شانلي سهنديم

او دا سن تك آتار اولدوزلارا شعريله كمندي

او دا سيمرغيدان آلماقدادي فندي

شعر يازاندا قلمينده ن باخاسان دور سپه لندي

سانكي اولدوزلار الندي

سؤز دييه نده گؤره سن قاتدي گولو، پوسته ني قندي

ياشاسين شاعير افندي

او نه شاعير كي، داغين وصفينه ميصداق اونو گؤردوم

من سنين تك اوجاليق مشقينه موششاق اونو گؤردوم

عشقه، عشق اهلينه موشتاق اونو گؤردوم

او نه شاعير كي، خيال مركبينه شو شيغيياندا

او نهنگ آت، آياغين توزلو بولودلاردا قوياندا

لوله لنمه كده دي يئر-گؤي، نئجه تومار ساريياندا

گؤره جكسن او زاماندا

نه زامان وارسا، مكان وارسا كسيب بيچدي بير آندا

كئچه جكلر، گله جكلر نه بوياندا – نه او ياندا

باخ نه حورمت وار اونون اؤز دئميشي توك پاپاغيندا

شهريارين تاج ايميش باشي دورموش قاباغيندا

باشينا ساوريلان اينجي، چاريق اولموش آياغيندا

وحي دير شعري ملك لردي پيچيلدار قولاغيندا

آيه لردير دوداغيندا

او دا داغلار كيمي شانينده نه يازسام ياراشاندير

او دا ظاليم قوپاران قارلا-كوله كله دوروشاندير

قودوزا، ظاليمه قارشي سينه گرميش، ووروشاندير

قودوزون كؤكونه، ظاليم بيره لر تك داراشاندير

آمما واختيندا فقير خالقي اييلميش سوروشاندير

قارا ميلله تده هونر بولسا، هونرله آراشاندير

قارالارلا قاريشاندير

ساريشاندير

گئجه حققين گؤزودور، تور تؤره تميش اوجاغيندا

اريييب باغ تك اوره كلردي يانارلار چيراغيندا

مئي، محبتدن ايچيب لاله بيتيبدير ياناغيندا

او بير اوغلان كي، پري لر سو ايچه رلر چاناغيندا

اينجي قاينار بولاغيندا

طبعي بير سئوگي لي بولبول كي، اوخور گول بوداغيندا

ساري سونبول قوجاغيندا

سولار افسانه دي سؤيلر اونون افسونلو باغيندا

سحه رين چنلي چاغيندا

شاعيرين ذووقو، نه افسونلو نه افسانه لي باغلار

آي نه باغلار كي “اليف لئيلي” دا افسانه ده باغلار

اود ياخيب داغلاري داغلار

گول گولورسه بولاغ آغلار

شاعيرين عالمي اؤلمز، اونا عالم ده زوال يوخ
آرزولار اوردا نه نه خاطيرله يه ايمكاندي، محال يوخ

باغ جنت كيمي اوردا “او حارامدير، بو حالال” يوخ

او محبتده ملال يوخ

اوردا حالدير، داها قال يوخ

گئجه لر اوردا گوموش دندي، قيزيلدان نه گونوزلر

نه زمرد كيمي داغلاردي، نه مرمر كيمي دوزلر

نه ساري تئللي اينه كلر، نه آلا گؤزلو اؤكوزلر

آي نئجه آي كيمي اوزلر

گول آغاجلاري نه طاووس كيمي چترين آچيب الوان

حله كروانيدي، چؤللر بزه نر سورسه بو كروان

دوه كرواني ده داغلار، يوكو اطلس دي بو جئيوان

صابيرين شهرينه دوغرو، قاتاري چكمه ده سروان

او خياليمده كي شيروان

اوردا قار دا ياغار آمما داها گوللر سولا بيلمز

بو طبيعت او طراوتده ماحالدير، اولا بيلمز

عؤمر پئيمانه سي اوردا دولا بيلمز

او اوفوقلرده باخارسان نه دنيزلر، نه بوغازلار

نه پري لر كيمي قولار، قونوب-اوچماقدا نه قازلار

گؤلده چيممه كده نه قيزلار

باليق اولدوز كيمي گؤللرده، دنيزلرده پاريلدار

آبشار موروريسين سئل كيمي تؤكدوكده خاريلدار

يئل كوشولدار، سو شاريلدار

قصريلر واردي قيزيلدان، قالالار واردي عقيق دن

رافائيل تابلوسي تك، صحنه لري عهد-عتيق دن

دويماسان كؤهنه رفيق دن

جنتين باغلاري تك باغلارينين حورو قوصورو

الده حوريلري نين جامي بولوري

تونگونون گول كيمي صهباي تهوري

نه ماراقلار كي، آييق گؤزلره رؤيادي دئييرسن

نه شافاقلار كي، ديرن باخمادا دريادي دئييرسن

اويدوران جنت مأوادي دئييرسن

زوهره نين قصري بيريليان، حصاري نرده سي ياقوت

قصري جادودي، موهنديس لري هاروت ايله ماروت

اوردا ماني دايانيب قالميش او صورتلره مبهوت

قاپي قوللوقچوسو هاروت

اوردا شعرين موزيكين منبعي سرچئشمه دي قاينار

نه پري لر كيمي فواره دن افشان اولوب اوينار

شاعير آنجاق اونو آنلار

دولو مهتاب كيمي ايستخريدي فواره لر ايله

ملكه اوردا چيمير، آي كيمي مهپاره لر ايله

گوللو گوشواره لر ايله

شعر و موسيقي شاباش اولمادا، افشاندي پريشان

سانكي آغ شاهيدير اولماقدا گلين باشينا افشان

نه گلينلر كي، نه انليك اوزه سورترلر، نه كيرشان

ياخا نه تولكو نه دووشان

آغ پري لر، ساري كؤينه كلي بولودلاردان ائنيرلر

سود گؤلونده ملكه ايله چيمركن سئوينيرلر

سئوينيرلر، اؤيونورلر

قووزاناندا هله الده دولو بير جام آپاريرلار

سانكي چنگي لره، شاعيرلره ايلهام آپاريرلار

دريا قيزلارينا پئيغام آپاريرلار

دنيزين اؤرتويو ماوي، اوفوقون سقفي سماوي

آينادير هر نه باخيرسان: يئر اولوب گؤيله موساوي

غرق اونون شعرينه راوي

غورفه لر، آي، بولود آلتيندا اولار تك گؤرونورلر

گؤز آچيب-يومما، چيراغلار كيمي يانديقدا سؤنورلر

صحنه لر چرخي فلك تك بورونوب، گاه دا چؤنورلر

كؤلگه ليكلر سورونورلر
زوهره ائيواندا الهه شينئلينده گؤرونركن

باخسان حافظي ده اوردا صلابتله گؤره رسن

نه سئورسن

گاه گؤره ن حافظ شيراز ايله بالكاندا دوروبلار

گاه گؤره ن اورتادا شطرنج قوراركن اوتوروبلار

گاه گؤره ن سازيله-آوازيله ايله نجه قوروبلار

سانكي ساغرده ووروبلار

خواجه الحان اوخوياندا، هامي ايشده ن دايانيرلار

او نوالرله پري لر گاه اويوبف گاه اويانيرلار

لاله لر شعله سي، الوان شيشه رنگي بويانيرلار

نه خومار گؤزلو يانيرلار

قاناد ايستر بو اوفوق، قوي قالا ترلانلي سهنديم

ائشيت اؤز قيصه مي، دستانيمي، دستانلي سهنديم

سني حئيدر بابا او نعره لر ايله چاغيراندا

او سفيل داردا قالان تولكو قووان شئر باغيراندا

شئيطانين شيللاغا قالخان قاتيري نوخدا قيراندا

بابا قورقور سسين آلديم، دئديم آرخامدي اينانديم

آرخا دوردوقدا سهنديم ساوالان تك هاوالانديم

سئله قارشي قووالانديم

جوشقونون دا قاني داشدي، منه بير هايلي سس اولدو

هر سسيز بير نفس اولدو

باكي داغلاري دا، هاي وئردي سسه، قيها اوجالدي

او تايين نعره سي سانكي بو تايدان دا باج آلدي

قورد آجالديقدا قوجالدي

راحيمين نعره سي قووزاندي دييه ن توپلار آتيلدي

سئي گليب نهره قاتيلدي

روستمين توپلاري سسلندي دييه ن بوملار آچيلدي

بيزه گول-غونچه ساچيلدي

قورخما گلديم دييه، سسلرده منه جان دئدي قارداش

منه جان-جان دييه رك، دوشمنه قان-قان دئدي قارداش

شهريار سؤيله مه دن گاه منه سولتان دئدي قارداش

من ده جانيم چيغيريب: جان سنه قوربان دئدي قارداش

ياشا اوغلان سيزه داغ-داش دلي جئيران دئدي قارداش

ائل سيزه قافلان دئدي قارداش

داغ سيزه آسلان دئدي قارداش

داغلي حئيدربابانين آرخاسي هر يئرده داغ اولدو

داغا داغلار داياغ اولدو
آرازيم آينا-چيراق قويمادا،آيدين شافاق اولدو

او تايين نغمه سي قووزاندي، اوره كلر قولاغ اولدو

يئنه قارداش دييه رك قاچمادا باشلار آياق اولدو

قاچديق، اوزله شديك آرازدا، يئنه گؤزلر بولاغ اولدو

يئنه غملر قالاق اولدو

يئنه قارداش ساياغي سؤزلريميز بير ساياق اولدو

وصل اييين آلمادا، ال چاتمادي عشقيم داماغ اولدو

هله ليك غم سارالاركن قارالار دؤندو آغ اولدو

آرازين سو گؤلو داشدي، قاياليقلاردا باغ اولدو

ساري سونبوللره زولف ايچره اوراقلار داراق اولدو

يونجاليقلار يئنه بيلديرچينه ياي-ياز ياتاغ اولدو

گؤزده ياشلار چيراغ اولدو

لاله بيتدي ياناغ اولدو

غونچا گولدو دوداق اولدو

نه سول اولدو، نه ساغ اولدو

ائليمي آرخامي گؤردوكده ظاليم اووچو قيسيلدي

سئل كيمي ظولمو باسيلدي، زينه آرخ اولدو، كسيلدي

گول گؤزونده ن ياشي سيلدي

تور قوران اووچو آتبن قوومادا سيندي، گئري قالدي

اؤزو گئتدي تورو قالدي

آمما حئيدربابا دا بيلدي كي، بيز تك هامي داغلار
باغلانيب قول-قولا زنجيرده بولودلار اودور آغلار

نه بيليم بلكه طبيعت اؤزو نامرده گون آغلار

ايري يوللاري آچاركن، دوز اولان قوللاري باغلار

صاف اولان سينه ني داغلار

داغلارين هر نه قوچو، ترلاني، جئيراني، مارالي

هامي دوشگون، هامي پوزغون، سينه لر داغلي، يارالي

گول آچان يئرده سارالي

آمما ظن ائتمه كي، داغلار يئنه قالخان اولاجاقدير

محشر اولماقدادي بونلار داها وولقان اولاجاقدير

ظولم دونياسي ياناركن ده تيليت قان اولاجاقدير

واي …! نه توفان اولاجاقدير

درديميز سانما كي، بير تبريز و تهران دير عزيزيم

يا كي، بيز توركه جهنم اولان ايراندا عزيزيم

يوخ بو دين دعواسيدير دونيا تيليت قاندير عزيزيم

تورك اولا، فارس اولا دوزلوك داها تالاندير عزيزيم

بيز آتان ديندير، آتان دا بيزي ايماندير عزيزيم

ساميري مروتد ائديب هه نه موسلماندير عزيزيم

اوممه تين هارونو من تك له له گيرياندي عزيزم

هر طرفدن قيليج ائنديرسه له قالخاندير عزيزيم

بير بيزيم درمانيميز موسي عمران دير عزيزيم

گله جك شوبهه سي يوخ آيه ي قورآندير عزيزيم

او هامي دردلره درماندير عزيزيم

د.وقتور اولدوقدا بشر بو ياراني ساغلاماق اولماز

اولماسا آللاه الي دين مرضين چاغلاماق اولماز

داغلاماقدا علاج اولسا بير ائلي داغلاماق اولماز

ديني آتميش ائله ياوروم داها بئل باغلاماق اولماز

او گولوب آغلايا دا، اونلا گولوب آغلاماق اولماز

شئيطاني ياغلاماق اولماز

دئدين: آذر ائلينين بير يارالي نيسگيلي يم من

نيسگيل اولسامدا گولوم بير ابدي سئوگيلي يم من

ائل مني آتسادا اؤز گوللريمين بولبولو يم من

ائليمين فارسيجادا درديني سؤيلر ديلي يم من

دينه دوغرو نه قارانليق ايسه ائل مشعلي يم من

ادبيات گولو يم من

نيسگيل اول چرچي يه قالسين كي جواهير ندي قانمير

مدنيت دبين ائيلير بدويت، بير اوتانمير

گون گئدير آز قالا باتسين گئجه سينده ن بير اويانمير

بير اؤز احوالينا يانمير

آتار اينسانليغي آمما يالان انسابي آتانماز

فيتنه قووزانماسا بير گون گئجه آسوده ياتانماز

باشي باشلارا قاتانماز

آمما منده ن ساري، سن آرخايين اول شانلي سهنديم

دلي جئيرانلي سهنديم

من داها عرش علا كؤلگه سي تك باشدا تاجيم وار

الده فرعونه قنيم بير آغاجيم وار

حرجيم يوخ، فرجيم وار

من علي اوغلويام آزاده لرين مرد و مورادي

او قارانليقلارا مشعل

او ايشيقليقلارا هادي

حققه ايمانه مونادي

باشدا سينماز سيپه ريم، الده كوتلمز قيليجيم وار